ORANJESTAD (AAN) – Den un entrevista reciente, Edsel Figaroa, presidente di sindicato TOPA, a anuncia cu e Convenio di Condicionnan Laboral (CAO) di FMSA (Fuels Marketing & Aruba Supplies NV) a wordo oficialmente extende pa un aña mas, despues di su vencemento dia 2 di juli.
Figaroa a splica cu anto e Gerencia tabata preferí un extension mas largu plazo, pero sindicato a opta pa evalua otro aña despues:
“Nos kier wak e resultado pa e proximo aña promé cu nos compromete na algo mas largu. Pero pa aworaki nos a logra un bon acuerdo y e trahadornan ta contento,” e a bisa.
Un CAO cu ta satisfactori pa e trahadornan
E presidente sindical a bisa cu, aúnke e CAO no ta necesariamente e miho di tur, e ta un di e mehor cu FMSA a tin te awor.
“Nos a firm’é dia 23 di juni. E CAO ta duna estabilidad laboral y ta contenta e empleadonan, esey ta importante,” Figaroa a agrega.
Plan pa e proximo CAO cu mas preparacion
Figaroa a indika cu sindicato lo kier comenzá e discusionnan pa e proximo CAO ya na Januari 2026, pa tin mas tempo pa discuti y negocia:
“Nos kier traha cu planeacion, no warda ultimo momento. Asina por logra resultado mihó.”
Rumor di venta di FMSA y posicion di sindicato
Durante e entrevista, e lider sindical tambe a referí na cierto rumor cu FMSA por wordo vendé.
“Nos ta cla: companianan estatal mester keda den man di gobierno. Bo no por bende bo baca cu ta duna lechi. Si bo bende e productor, lo bo keda cu nada,” Figaroa a declara.
Estructura di FMSA y su importancia económico
Figaroa a duna un klarificacion riba e estructura di e grupo:
-
RdA ta e compania madre cu ta trata cu petroleo.
-
FMSA tin dos subdivisiones:
-
Smsa Aviation, responsable pa suministro di fuel na avionnan.
-
Smsa Distribution, encarga cu pomp stations.
-
“FMSA ta e fuente di produccion real – e baca cu ta duna lechi. Si bo separa su parti y bende e principal, bo por keda cu dos manjanan sin fuente di ingreso,” Figaroa a concluí.
Discussion about this post